Մեր նպատակը

«Հայերեն էլեկտրոնային սրբագրման համակարգի» նպատակն է առավել ամբողջական և լիարժեք կերպով սրբագրել արդի արևելահայերենով գրված ցանկացած տեքստ:

Հաշվի առնելով ժամանակակից հայերենի ձևայնացման առանձնահատկությունները և մշակելով դրանք նկարագրելու ուրույն համակարգ՝ ArmSpell հայերեն էլեկտրոնային նոր սրբագրիչի շտեմարանը լիարժեք կերպով արտացոլում է հայերենի արդի վիճակը, քանի որ ներառում է ոչ միայն հայերենի հիմնական բառաֆոնդը, թեքվող ձևերի տարբերակային ձևերը, այլև՝

հատկապես վերջին շրջանում ստեղծված մեծաթիվ նոր բառեր և նորաբանություններ,
օտարաբանություններ,
հատուկ անուններ՝ աշխարհագրական անուններ, անձնանուններ, ազգանուններ,
հապավումներ,
համառոտագրություններ:

Կայքից օգտվողների թիվը որևէ սահմանափակում չունի: Ծառայելով հասարակության լայն շրջանակներին՝ այն կարող է օգտակար լինել.

ա. արևելահայերի համար ցանկացած տեքստի սրբագրման ժամանակ (գիտական, հրապարակախոսական, գեղարվեստական և այլն),

բ. արևմտահայերի համար, որոնք, ուղղագրական համակարգերի տարբերություններով պայմանավորված, ոչ միշտ են կարողանում ինչպես ճիշտ ուղղագրությամբ արևելահայերեն տեքստեր գրել, այնպես էլ առհասարակ լիարժեք կերպով կիրառել հայերենի քերականական կանոնները:

գ. օտարերկրացիների համար, որոնք բավարար լեզվական գիտելիքներ չունենալու պատճառով չեն կարող կառուցել իրենց գրավոր խոսքը պատշաճ մակարդակով:

ArmSpell սրբագրման համակարգի շտեմարանի հիմքում ընկած են հետևյալ բառարաններն ու բառացանկերը.

Է. Աղայանի «Արդի հայերենի բացատրական բառարան»,
Ա. Սուքիասյանի «Հայոց լեզվի հոմանիշների բացատրական բառարան»,
Ս. Գալստյանի «Դպրոցական բառակազմական բառարան»,
«Նոր բառեր» Ա- Դ պրակներ,
Փ. Մեյթիխանյանի «Հայերենի ուղղագրական նոր բառարան»,
Ա. Հայրապետյանի «Օտար բառերի բառարան»,
Դ. Գյուրջինյանի, Ն. Հեքեքյանի «Հայերենում գործածվող տառային հապավումների բառարան»,
Կ. Առաքելյանի «Հատուկ անունների բառարան»,
Ա. Սուքիասյանի, Ք. Սուքիասյանի «Արդի հայերենի ուղղագրական-ձևակազմական բառարան»,
ՀՀ Կառավարությանն առնթեր անշարժ գույքի կադաստրի կոմիտեի «Աշխարհագրական անվանումների հայերեն լեզվով էկզոնիմների ցանկ»:

https://armspell.am/hy ArmSpell կայքը և սրբագրման համակարգը կարող է կիրառել ցանկացած մարդ՝ անկախ սեռից, տարիքից, կրթական մակարդակից, բնակության վայրից: